📰 गदाना येथे लक्ष्मी माता यात्रा उत्सव उत्साहात पार

www.themaharashtratoday.com

गदाना ( ता.खुलताबाद ) प्रतिनिधी | अशोक अधाने | दि. २३ ऑगस्ट २०२५

गदाना येथे दरवर्षी प्रमाणे यंदाही लक्ष्मी माता यात्रा उत्सव मोठ्या उत्साहात व शांततेत पार पडला. आज दिनांक 23 ऑगस्ट 2025 रोजी सकाळी 11 ते 1 या वेळेत पारंपरिक पाडवा उत्सव साजरा करण्यात आला.

या उत्सवामध्ये शेतकऱ्यांचा प्रिय सखा नंदी म्हणजेच बैलाची मिरवणूक वाजतगाजत काढण्यात आली. गावामध्ये असलेल्या 18 पगड जातींमधील विविध मंडळे व ताफ्यांनी आपापल्या वाद्यांच्या गजरात मिरवणूक काढली. अधाने मंडळ, चव्हाण मंडळ, धनगर समाज यांसह इतर मंडळांनीही ठरलेल्या ठिकाणावरून गावाच्या मुख्य दिशेने मिरवणूक काढत उत्सवात सहभागी झाले.

पाडवा उत्सवाची सांगता होताच दुपारी 1 ते 2 वाजेपर्यंत देवी मातेच्या गळ (बैलगाड्या) नोंदणीची परंपरा पार पडली. यामध्ये सर्वप्रथम बोरवाडी येथील गळाची नोंदणी करण्यात आली. त्यानंतर पाहुण्यांची व गावातील इतर मंडळांची गळ नोंदणी करण्यात आली.

यानंतर दुपारी दोन वाजल्यापासून लक्ष्मी माता यात्रेतील 12 गाड्या ओढण्याची परंपरा उत्साहात सुरू झाली. हा पारंपरिक सोहळा मारुती मंदिर ते लक्ष्मी माता मंदिर या मार्गावर पार पडला. गावकऱ्यांनी तसेच बाहेरून आलेल्या पाहुण्यांनी देवीच्या यात्रेत सहभाग नोंदवत उत्सव साजरा केला.

परंपरेला अनुसरून झालेल्या या उत्सवात भाविकांनी देवी मातेसाठी श्रद्धाभाव व्यक्त केला व पाडवा उत्सवाची सांगता देवी मातेच्या गळाने करण्यात आली.