📰 ईव्हीएमच्या स्ट्राँग रूमबाहेर सशस्त्र पोलिसांचा कडेकोट बंदोबस्त

www.themaharashtratoday.com

मोबाईल नं. 9623871987

दिनांक : 08 फेब्रुवारी 2026

प्रतिनिधी : अशोक अधाने

——————————————

खुलताबाद | जिल्हा परिषद व पंचायत समिती निवडणूक खुलताबाद तालुक्यात शनिवारी शांततेत पार पडली असून, आता तालुक्यातील नागरिकांचे लक्ष निवडणूक निकालाकडे लागले आहे. या पार्श्वभूमीवर ईव्हीएम मशीनच्या सुरक्षिततेसाठी प्रशासनाकडून कडेकोट पोलीस बंदोबस्त तैनात करण्यात आला आहे.
शनिवारी पार पडलेल्या जिल्हा परिषद व पंचायत समिती निवडणुकीतील वापरण्यात आलेली ईव्हीएम मशीन स्ट्राँग रूममध्ये सुरक्षित ठेवण्यात आली असून, त्यांच्या संरक्षणासाठी शस्त्रधारी राखीव पोलीस दल (SRPF) तैनात करण्यात आले आहे. स्ट्राँग रूम परिसरात चोख सुरक्षा व्यवस्था ठेवण्यात आली असून, कोणतीही अनुचित घटना घडू नये यासाठी विशेष दक्षता घेण्यात येत आहे.
दरम्यान, या निवडणुकीचे निकाल 9 फेब्रुवारी रोजी सकाळी 10 वाजता कैलास औद्योगिक प्रशिक्षण संस्था येथे जाहीर होणार असून, त्याच ठिकाणी मतमोजणी प्रक्रियेला सुरुवात होणार आहे.

🚨 पोलिस कर्मचाऱ्यांनी व्यक्त केली नाराजी

मात्र, गेल्या दोन दिवसांपासून बंदोबस्तावर तैनात असलेल्या SRPF पोलिस कर्मचाऱ्यांना वेळेवर जेवण मिळत नसल्याने नाराजी व्यक्त करण्यात आली आहे. प्रशासनातर्फे जेवणाची व्यवस्था वेळेवर होत नसल्यामुळे पोलिस कर्मचाऱ्यांच्या आरोग्यावर तसेच कर्तव्यदक्षतेवर विपरीत परिणाम होण्याची शक्यता व्यक्त केली जात आहे.
सुरक्षा व्यवस्थेच्या दृष्टीने ही बाब गंभीर असून, संबंधित अधिकाऱ्यांनी तातडीने याची दखल घेऊन आवश्यक उपाययोजना करणे गरजेचे असल्याची मागणी पोलिस कर्मचाऱ्यांकडून करण्यात येत आहे.
एकीकडे निवडणूक प्रक्रिया पारदर्शक व सुरळीत पार पाडण्यासाठी पोलीस प्रशासन रात्रंदिवस कार्यरत असताना, त्यांच्या मूलभूत गरजांकडे दुर्लक्ष होऊ नये, अशी अपेक्षा व्यक्त केली जात आहे