अवैध हातभट्टीवर पोलिसांचा मोठा घाव; पिंपळगाव हरेश्वर हद्दीत लाखोंचा साठा नष्ट

www.themaharashtratoday.com

 प्रतिनिधी : अशोक अधाने

मोबाईल नं. 9623871987

पिंपळगाव हरेश्वर, दि. ११ एप्रिल २०२६ :
अवैध गावठी दारू निर्मितीविरोधात पिंपळगाव हरेश्वर पोलिसांनी धडक कारवाई करत मोठ्या प्रमाणात रसायन व तयार दारू नष्ट केली. या मोहिमेमुळे परिसरातील बेकायदेशीर दारू व्यवसायाला मोठा धक्का बसला आहे.

गुप्त माहितीच्या आधारे गहुले धरण परिसर आणि बहुळा नदीच्या काठावर सुरू असलेल्या हातभट्टी कारखान्यांवर पोलिसांनी अचानक छापा टाकला. झाडाझुडपांत लपून चालणाऱ्या या अवैध व्यवसायाचा पोलिसांनी पर्दाफाश केला.

कारवाईदरम्यान काही संशयितांना घटनास्थळीच ताब्यात घेण्यात आले. शिंदाड परिसरातील काही आरोपी तसेच नदीकाठावर कार्यरत असलेले अन्य इसम हे दारू तयार करताना पोलिसांच्या हाती लागले.

या मोहिमेत पोलिसांनी हजारो लिटर कच्चे व उकळते रसायन तसेच तयार गावठी दारू जप्त केली. अंदाजे दोन लाखांहून अधिक किमतीचा हा साठा जागेवरच नष्ट करण्यात आला. हातभट्टीसाठी उभारण्यात आलेली उपकरणे व भट्ट्याही पूर्णपणे उद्ध्वस्त करण्यात आल्या.

याचबरोबर एका स्वतंत्र कारवाईत एका इसमाकडून बेकायदेशीर देशी दारू विक्री करताना पकडून त्याच्यावर गुन्हा दाखल करण्यात आला असून त्याच्याकडील दारूचा साठाही जप्त करण्यात आला आहे.

सदर प्रकरणी महाराष्ट्र दारूबंदी कायद्यान्वये विविध गुन्हे नोंदविण्यात आले असून पुढील तपास सुरू आहे.

ही संपूर्ण कारवाई वरिष्ठ पोलीस अधिकाऱ्यांच्या मार्गदर्शनाखाली पार पडली. स्थानिक पोलीस अधिकाऱ्यांनी व कर्मचाऱ्यांनी समन्वय साधत ही मोहीम यशस्वी केली.

या कारवाईनंतर परिसरात अवैध दारू निर्मिती व विक्री करणाऱ्यांमध्ये घबराट निर्माण झाली असून पोलिसांकडून अशा कारवाया पुढेही सुरू राहणार असल्याचे संकेत देण्यात आले आहेत.