🗳️ शिवसेना (शिंदे गट) गंगापूर तालुका समन्वयक सारंगधर जाधव यांचा राजीनामा अर्ज दाखल

www.themaharashtratoday.com

मोबाईल नं. 9623871987

 दिनांक : 21 जानेवारी 2026

 प्रतिनिधी : अशोक अधाने

गंगापूर तालुक्यात शिवसेना (शिंदे गट) संघटनात्मक पातळीवर महत्त्वाची घडामोड समोर आली असून तालुका समन्वयक पदावर कार्यरत असलेले श्री. सारंगधर जाधव यांनी आपल्या पदाचा तसेच शिवसेना पक्ष सदस्यत्वाचा राजीनामा अर्ज दाखल केला आहे.
यासंदर्भात त्यांनी माननीय श्री. बाबासाहेब जी जगताप साहेब, जिल्हाप्रमुख शिवसेना (ग्रामीण), छत्रपती संभाजीनगर यांच्याकडे राजीनामा स्वीकारण्यासाठी लेखी अर्ज पाठवला असून, सदर अर्जनामा सध्या स्वीकार प्रक्रियेसाठी सादर करण्यात आलेला आहे.
राजीनामा अर्जामध्ये त्यांनी नमूद केले आहे की, जिल्हा परिषद व पंचायत समिती निवडणूक 2025 च्या पार्श्वभूमीवर गंगापूर तालुक्यातील आरक्षित (एस.सी.) प्रवर्गाच्या जिल्हा परिषद व पंचायत समितीच्या एकही जागा युतीमध्ये शिवसेना पक्षाला सोडून देण्यात आलेल्या नाहीत.
यामुळे गंगापूर तालुक्यात शिवसेना पक्षामध्ये कार्यरत असलेल्या आरक्षित प्रवर्गातील पदाधिकारी व कार्यकर्त्यांचा निवडणूक प्रक्रियेत पुरेसा विचार होत नसल्याची भावना त्यांनी व्यक्त केली आहे.
तसेच, एस.सी. समाजातील शिवसेना पक्षात काम करणाऱ्या पदाधिकारी व कार्यकर्त्यांना तालुक्यातील वरिष्ठ नेतृत्वाकडून न्याय मिळत नसल्याचा आरोप करत, या कारणास्तव आपण गंगापूर तालुका समन्वयक पदाचा व शिवसेना पक्ष सदस्यत्वाचा राजीनामा अर्ज दिल्याचे त्यांनी स्पष्ट केले आहे.
या घडामोडीमुळे गंगापूर तालुक्यातील राजकीय वर्तुळात चर्चांना उधाण आले असून, सदर राजीनामा अर्जावर पक्षाची पुढील भूमिका काय राहते याकडे सर्वांचे लक्ष लागले आहे.